عروستى
الحلوه كبرت وأنا عاشق وكلى غرام
نظرة عنيها أمل وسكوتها كله كلام
تنطق عنيها نغم أما الشفايف صمت
وسألت عن مهرها قالوا مش أرقام
الحلوه دى مهرها مصنع يكون شغال
ويغنى صوت المكن يوم الفرح موال
وانسج خيوط الأمل فستان لزفتها
واكتب غناوى ليها أحلى كلام يتقال
والشبكه تبقى ترعه محفوره فى الصحرا
تروى الغيطان والشجر تبقى جناين خضرا
تطرح فروع الشجر فاكهه وضليله
يحلى القعاد تحتها والضجه والسهره
وجهازها لازم بقا يكون من الغالى
أسطول بيرمى الشبك والبحر بيلالى
يطلع سمك فى الشبك يرقص وبيغنى
ويقول أنا جيت ليكم طوبى هنيالى
وابنى ليها شقه أبنيها بالإيمان
طوبه تكون بالرضا والتانيه تبقى حنان
خلى المحبه أساس زود ليها المونه
لكل مبنى عمد وضميرك العمدان
شربتها نستخرجه بترول من الآبار
والبسمه هتكرره وتقدمه للجار
الجار يدوق شهدها يخلص لها وده
ويعيش على حبها ويقول لها أشعار
يوم الفرح هعمله ليله ألفين شهر
طير السما وقتها هيقول قصايد شعر
إسم العروسه
مرح صمود رفعه
دى أولى حروف إسمها
تبقى العروسه
مصر
***
زجل .. عادل إمام عماره
جده فى .. 15 /11 /2009
حصريا .. قهوة المصريين
www.3gypt.com/vb
يحذر النقل والنشر
ليست هناك تعليقات:
إرسال تعليق